Sunterklaos
AlgemeenCOLUMN: ‘t Is gin mense ontgaon, Sunterklaos is in ‘t land. Ik verbaze miej der elk joor aover hoovölle olde luu zich met de bisschop van Myra en zien personeel, bemäöjt. Ik hebbe altied edach dat ‘t ‘n kinderfeest was, maor sinds de discussie aover dat ‘van kleur verschie:ten’ weet ik better; kinder maakt zich door namelek neet druk aover.
De andere kleur door he’k begrip veur. De hele discussie hef mien trouwens nooit in ‘t biezunder bezeg ehollen; der wodden tevölle onzin bie-ehaald. Ik hebbe al joren niks meer met dat vief-december-feest; woorumme mot dén boordmans altied tegelieke met mien verjeurdag vieren?
As kind trouwens nooit naodeel van ehad. Op de legere schole wodden ik dén dag deur de zönne van de warme bakker met-enomm naor de winkel en kree’k ‘n groten buul met snoepgoed. Iej könt der ok geluk met hebm,
Kinder vindt de ankomst van Klaos en zien gevolg fantastisch; zee geleuft nog in sprookjes. ‘t Is belangriek um op-evoed te wodden met verhalen dee-t de fantasie prikkelt. Door wo’j creatief van met ‘t bedenken van oplossingen veur probleemm en nog völle meer belangrieke vaardegheden, dee-t oe helpt bie ‘t ‘groter greujen’.
Bliekbaor mag dát ok neet meer. Der is ‘n clubje ‘woke broeders’ op-estaone um ‘t kind te beschermm tegen teleurstelling. De boodschap dat sunterklaos in ’t echt hillemaole neet besteet zol onherstelbare emotionele schade oplevern. Zee wilt ‘m an de kante schoevm, asof e nooit hef bestaon. Wat ‘n (plaatse veur twinteg vluukwoorden) onzin is dat noe weer. Met zukke lariekoek bu’w van onze kinder bewust ‘zachtgekaokte eitjes’ an ‘t maken; weerloze wezentjes dee-t gin teegnslag meer ankönt.
As ‘t woor is dan mot noe de helfte van de bevolking bie de psychiater loopm. Wee geleuft dat? ‘t Denken aover ‘t kinderfeest kan met de joorn verandern. Is miej ok gebeurd. De roetvaegpiet kan’k doorumme prima verdraagn, maor mo’w ‘n kind ‘t heilege geleuven ontnemmen, um de onhulling van de woorheid te umzeilen? Dát is miej te gorteg.
